HENERAL LUNA THE MOVIE BY JERROLD TAROG

At iba pang mga karakter sa pelikulang HENERAL LUNA

 

Ang pelikulang HENERAL LUNA na pinagbibidahan ng mahusay na aktor na si John Arcilla, ay isang obra ng isa sa pinakabatang direktor ng pelikulang Filipino ng makabagong henerasyon na si Jerrold Tarog.

HENERAL LUNA MOVIE POSTER
HENERAL LUNA MOVIE POSTER

Mahalagang mapanood ng sambayanang Filipino, lalo na ng mga kabataan ang HENERAL LUNA upang malaman, maunawaan, maitama, at maiwasto ang mga pangyayaring naganap sa ating bansa nung panahon ng mga Kastila at Amerikano na sumakop sa ating bayan.

Ang HENERAL LUNA ay isang matapang na pelikula na walang pakundangan inilabas ang ‘lihim’ ng kasaysayan na magpapabago sa isipan ng ating lahat, sa mga tunay na kaganapan sa buhay ni Antonio Luna, Emilio Aguinaldo, at sa mga karakter na nabuhay nung 1800 siglo.

ANTONIO LUNA ARCHIVE PHOTO
ANTONIO LUNA ARCHIVE PHOTO

Ang HENERAL LUNA ay kwento ng pagsisikap ni Luna na mapalaya ang bansang Republika ng Pilipinas sa mga kamay ng banyagang mananakop ng ating bayan. Iminumungkahi ni Luna sa gobyerno na tulungan ang Hukbong Sandatahan ng Republikang Pilipinas na gawin nito ang nararapat, magtagumpay man o mamatay, para sa Inang Bayan.

Subalit nagkakagulo noon sa gabinete ni Aguinaldo at ang ibang sundalo, partikular ang hukbo ng Kawit ay di sang-ayon sa pamumuno ni Luna. Ito ay nagbigay daan upang matalo ang pwersa ng Bagbag at Quingan, at isisi kay Luna ang pagbagsak ng mga kampong nabanggit.

EMILIO AGUINALDO ARCHIVE PHOTO
EMILIO AGUINALDO ARCHIVE PHOTO

Nangagalaiti sa galit ang heneral dahil tila ba ang ibang nakaupo sa gobyerno ni Aguinaldo ay ang mga pansariling interes lamang ang iniintindi. ‘Bayan o sarili?‘ ang tanong ni Luna sa mga ito bilang tugon sa mungkahi nila Felipe Buencamino at Pedro Paterno na makipag-usap ng mapayapa sa mga Amerikano upang mabigyan ng proteksyon ang Republika ng Pilipinas.

Binansagang mga traydor ni Luna ang mga gabineteng nagpapasailalim sa mga Amerikano at para sa kaniya, dapat lamang na sila ay maparusahan. “Walang nakaangat sa batas. Kahit na presidente.

Nagtapos ang buhay ni Heneral Luna sa kamay ni Kapitan Pedro Janolino at sa mga kasama nitong mga sundalong taga-Kawit. Binaril at pinagsasaksak ng tatlumpong beses hanggang malagutan ng hininga ang heneral na mariing nakapuyos ang mga kamay sa galit sa mga pumaslang sa kaniya.

Bago namatay si Luna, isinigaw pa niya mga katagang, “Mga duwag! Mga traydor!

At iba pang karakter

Sa pelikula, may mga importanteng tao ang ipinakilala ngunit maaring hindi sila ganun ka-popular hindi katulad ng mga mahalagang karakter na lumabas sa HENERAL LUNA. Ipakilala natin sila.

Jose Torres Bugallon

JOSE TORRES BUGALLON ARCHIVE PHOTO
JOSE TORRES BUGALLON ARCHIVE PHOTO

Habang nakikipaglaban ang Hukbong Sandatahan ng Republika ng Pilipinas sa La Loma sa ilalim ni Heneral Antonio Luna sa laban sa pwersa ni Heneral Arthur MacArthur, may isang eksena na kung saan may isang sundalong sugatan ang binigyang pugay ng heneral dahil sa pinakita nitong katapangan sa pakikipaglaban sa mga Amerikano. Ang sundalo ay mayroong matinding tama ng bala sa hita at sa pagkakataong iyun, bilang si Luna ay may kapangyarihang batas, itinaas nito ang rango ng sundalo bilang isang tinyente koronel. Nalagutan ng hininga ang sundalo makaraan lamang ang ilang sandali noong Pebrero 4, 1899.

Sa aklat ng kasaysayan, ang sundalong ito ay si Jose  Torres Bugallon, na isang komandante noong ito ay nakikipaglaban sa giyera laban sa mga Amerikano sa bayan ng Marikina at Kalookan.

Lieutenant Garcia

Sa aklat ng kasaysayan, may isang matapang na sundalo na kinilala ni Antonio Luna. Sa pelikula, naghahanap si Luna ng sundalong kayang ibuwis ang buhay para sa bayan at isang Tinyente Garcia ang sumunod sa utos ng heneral. Matapos na maipakita ni Garcia ang kaniyang katapangan at katapatan, iminungkahi ni Luna kay Koronel Paco Roman na ihanay sa mga Tiradores si Garcia.

Sa kasaysayan, itinatag ni Luna ang Guardia Negra (Black Guard), isang espesyal na hukbo na binubuo ng dalawamput-limang katao na pinamunuan ni Garcia, bilang isa ito sa pinakamagaling na sundalo sa larangan ng mga armas.

Nicolosa Dayrit

NICOLASA PANLILIO DAYRIT ARCHIVE PHOTO
NICOLASA PANLILIO DAYRIT ARCHIVE PHOTO

Isang espesyal na karakter ang ipinakilala sa pelikulang HENERAL LUNA at sa unang tingin ng manonood ito ay ang kasintahan ng magiting na heneral na walang iba kundi si Ysidra Cojuangco. May pagkakahawig naman sapagkat sa pelikula ay ipinakita na may tagong relasyon ang dalawang karakter na base sa tala ng kasaysayan, ay ang lihim na pag-iibigan ni Luna at Ysidra.

Ngunit bukod sa pagiging magkasintahan sa pelikula, ipinakita rin ang karakter na pinangalanang Isabel, na isa sa mga binibini ng panahon ng giyera na sumubok na pakiusapan ang nagbabanggaang sina Heneral Luna at Heneral Tomas Mascardo na magkasundo alang-alang sa bayan. Nagkaroon ng hidwaan ang dalawang heneral ng hindi sumunod sa utos si Mascardo na magpadala ng karagdagang kawal.

Ang karakter na Isabel samaktuwid marahil ay ang makabayang si Nicolosa Pamintuan Dayrit, tubong San Fernando, Pampanga, na isa rin sa mga tumulong sa mga sundalong sugatan nung panahon ng giyera laban sa mga Amerikano.

Pinagsama marahil ang karakter nila Ysidra at Nicoloasa sa katauhan ni Isabel, na ginampanan ni Mylene Dizon upang maipakita sa pelikula ang naging bahagi nila sa buhay ni Antonio Luna.

Trinidad Aguinaldo

TRINIDAD FAMY AGUINALDO ARCHIVE PHOTO
TRINIDAD FAMY AGUINALDO ARCHIVE PHOTO

Panghuli nating tatalakayin ay ang ina ni Presidente Emilio Aguinaldo na ipinakita sa mga maigsi ngunit mahalagang eksena sa pelikula. Mahalagang isama sa ating kwento ang ina ni Aguinaldo na si Trinidad Famy sapagkat ayon sa libro ni Julio Nakpil, ‘Apuntes Sobre la Revolución Filipina (Notes on the Philippine Revolution), nakasaad sa pahinang 130, naisulat dun na noong paslangin ang heneral, ang ina ni Aguinaldo ay nakadungaw sa isang bintana at nagsalita, “Ano humihinga pa ba yan?” patungkol sa katawan ni Luna na pinagtulungan ng mga kawal ni Aguinaldo noong Hunyo 5, 1899 sa Kumbento ng Kabanatuan.

Pilit na pinabulaanan ni Presidente Aguinaldo na may alam sya sa pagpatay kay Luna at sya ay may ipinadalang telegrama sa heneral upang ito ay tumuloy ng Kabanatuan.

Anuman ang pagkubli sa katotohanan, ito ay lumalabas din ng kusa. Maaring hindi pa rin mapatunayan hanggang ngayon kung si Aguinaldo nga ang nagpapapatay kay Aguinaldo, o maging kay Andres Bonifacio, ngunit ang kaniyang kapangyarihan bilang presidente ng mga panahon na yun ay isang pagpapatunay na mayroon syang kapangyarihan na gawin ito o pigilan ang pagkamatay ng dalawang bayani ng Republika ng Pilipinas.

Ang misteryosong katanungan ay kung bakit nakasilip ang matandang Aguinaldo at inalam pa kung buhay pa si Luna ng mga sandaling iyun?

*Ang mga larawan ay hinango sa mga sapot-lugar kung saan ito ay unang nakita.

 

Book & Buy

Viewed 93530 times by 17468 viewers

ADMIN

Juan Manila Express is a magazine-themed blog of different niche from daily grind to headline news, to entertainment updates and social media related topics. Email us at [email protected] for your suggestions and comments. Thank you for visiting!

More Posts

ADMIN

Juan Manila Express is a magazine-themed blog of different niche from daily grind to headline news, to entertainment updates and social media related topics. Email us at [email protected] for your suggestions and comments. Thank you for visiting!

Let's Talk!